გენდერული თემების გაშუქების საკითხი, შეიძლება ითქვას, რომ ქართული მედია სივრცისთვის ჯერ კიდევ აქტუალურია. მიუხედავად იმისა, რომ საქართველოს კანონი „მაუწყებლობის შესახებ" და კომუნიკაციების ეროვნული კომისიის მიერ მიღებული „მაუწყებელთა ქცევის კოდექსი" განსაზღვრავს ნორმებს, რომლებიც გენდერული საკითხების გაშუქებას ეხება, თემაზე მუშაობისას ჟურნალისტების მიერ გენდერული საკითხების არასწორად გაშუქების ფაქტები მაინც გვხვდება. ხშირია გენდერული სტერეოტიპებით აზროვნება, სექსისტური ენა, ისეთი გამონათქვამი და შედარება, რომელიც აკნინებს და შეურაცხყოფს ქალებს და ლახავს მათ ღირსებას. ერთ-ერთი მნიშვნელოვანი პრობლემა შეიძლება ითქვას, რომ ქალების მიმართ გენდერული ნიშნით ძალადობის გამართლებაა.

„ალიას" 2017 წლის 6-12 თებერვლის ნომერში ვკითხულობთ:
„მისი განმარტებით [ირანელი სასულიერო ლიდერს აიათოლა კეზეს გულისხმობს], თუკი მიწისძვრა მოხდება და ამის დიდი ალბათობა არსებობს კიდეც, ყველაფერში დამნაშავე სუსტი სქესი იქნება, რადგან ქალები მუდმივად იმას ცდილობენ, მამაკაცებს თავი მოაწონონ, შეაცდინონ და ხორციელი ტკბობა განიცადონ".
წყარო: რუსული ტაბლოიდური ონლაინ გამოცემება Mainfun.ru

მნიშვნელოვანია ის ფაქტიც, რომ რუსულ წყაროებზე დაყრდნობით გენდერული სტერეოტიპების შემცველი მასალები, ძირითადად სხვადასხვა ქვეყანაში ჩატარებული კვლევების შედეგებსა თუ „მეცნიერების დასკვნებზეა" მომზადებული, რომელთა წყაროებიც, დაუზუსტებელი და არაიდენტიფიცირებულია.